Trumpekin gosaltzen dugu egunero eta nazkatuta gaude. Bere azken okurrentziak asaldatzen gaitu irratitik goizeko lehen kafesnearekin. Ez da eguna hasteko modu osasuntsua.

Hanka ezkerrarekin esnatzea omen da txarra, sinismen kolektiboan txertatuta dagoenez. Horren atzean ezkerrek historian zehar izan duten izen txarra dago (eta jazarpena). Bada, Trumpekin esnatzea hanka eskuinarekin esnatzea bada, askoz nahiago ohetik lurrera ziplo erori eta katuka iritsi sukalderaino.

DEIren aurkako politikak dira gizonkote ilehoriaren obsesioak. Bere ustez aniztasuna, ekitatea eta inklusioa dira egungo gaitz larrienak, eta horiei aurre egin behar zaie bai edo bai. Grazia egingo liguke hain larria ez balitz. Zenbatetan ez ote duten esan “gaur egun ezin da ezer esan”, eta orain, gustatzen ez zaizkionak isilaraztea, ezabatzea, da bere bidea. Historia irabazleek idazten dute eta Trumpek literalki heldu dio esanari. Berak kontatu nahi du historia, gertatu dena eta gertatuko dena.

Trumpen administrazioak milaka artxibo historiko arriskuan jarri ditu. Ameriketako Estatu Batuetako Defentsa Departamentuaren argazki artxiboa errepasatzen ari da, bere betaurreko propioekin, eta gustatzen ez zaizkion argazkiak borratzeko agindua eman du. Hortaz, aniztasuna, ekitatea eta inklusioa erakusten edo kontatzen duten milaka artxibo digital ezabatzen ari dira Trumpen aginduz. The Associated Press (AP) agentziak jakinarazi duenez, 26.000 irudi eta argitalpen baino gehiago markatu ditu, baina baliteke 100.000 izatea.

Emakumeak armadan, soldadu beltzak, “Historia Beltzaren Hilabetea” edo “Emakumearen Historiaren Hilabetea”. Artxibotik borrarazi nahi ditu Trumpek gertatu diren baina gustatzen ez zaizkion momentuak, argazkiek betikotu egiten dituztelako. Eta tartean Hiroshimako hegazkinaren argazkiak ere markatuta daude, borratuak izateko. Enola Gay izena zuen Hiroshimara bonba atomikoa jaurtitzeaz arduratu zen hegazkinak, pilotuaren amaren omenez. Baina Trumpi “Gay” abizena ez zaio gustatzen, homosexualitateari lotzen diolako, eta borratzeko agindua eman du.

Ikaratzekoak dira Trumpen obsesioak, baina ez zaizkigu hain urrunak iruditzen. Gure herrian ere “eta” lotailua borratua izateko arriskuan izan da behin baino gehiagotan. Ezjakintasuna eta boterea, konbinazio arriskutsua.

Txarrena da “molestatzen” diotenak ez dituela argazkietatik bakarrik borratu nahi Trumpek. Jarraituko dugu gogaituta egunero, ezer gertatuko ez balitz bezala gosaltzea ez baita aukera bat.